കൊച്ചി: തൊടുപുഴയിലെ ന്യൂമാന്സ് കോളേജിലെ പ്രൊഫസര് ടി.ജെ. ജോസഫിന്റെ കൈവെട്ടിയതിനെ സിനിമ സംവിധായകനായ പി.ടി.കുഞ്ഞുമുഹമ്മദ് അപലപിച്ചു. പി.ടി. കുഞ്ഞുമുഹമ്മദിന്റെ ലേഖനങ്ങളിലെ പരാമര്ശങ്ങളാണ് താന് ചോദ്യപേപ്പറില് ഉള്പ്പെടുത്തിയത് എന്ന പ്രൊഫസര് ടി.ജെ.ജോസഫിന്റെ വിശദീകരണത്തെ തുടര്ന്നാണ് പിടി. കുഞ്ഞുമുഹമ്മദിന്റെ പ്രസ്താവന.
ഇത്തരം പ്രവണതകള് അനിസ്ലാമികമാണെന്ന് പറഞ്ഞ അദ്ദേഹം തന്റെ ഭ്രാന്തനെന്ന കഥാപാത്രത്തിന് പേര് നല്കിയില്ലെന്നും മുഹമ്മദ് എന്ന പേര് നല്കിയ പ്രൊഫസറിന്റെ പ്രവര്ത്തിയാകാം ചിലരെ ചൊടിപ്പിച്ചതെന്നും അദ്ദേഹം വാര്ത്താമാദ്ധ്യമങ്ങള്ക്കായി നല്കിയ പ്രസ്താവനയില് പറഞ്ഞു. ഭാഷാ ഇന്സ്റ്റിറ്റിയൂട്ട് പുറത്തിറക്കിയ പുസ്തകം താന് കണ്ടിട്ടില്ലെന്നും അതില് താന് നേരിട്ട് ലേഖനം നല്കിയിട്ടില്ലെന്നും ബിനുകുമാര് താനുമായി നടത്തിയ സംഭാഷണത്തില് നിന്നും തയ്യാറാക്കിയതാണെന്നും പി.ടി വിശദീകരിച്ചു. ചില ഗൂഢശക്തികള് കേരളത്തിലെ സമൂഹത്തെ ഭിന്നിപ്പിക്കാന് അണിയറയില് കുത്സിത നീക്കങ്ങള് നടത്തുന്നുണ്ടെന്നും മുസ്ലീം സംഘടനകള് ഇതിനെതിരെ വളരെ ജാഗ്രത പാലിക്കണമെന്നും അദ്ദേഹം ആവശ്യപ്പെട്ടു.
